Firaq-Gorakhpuri
Firaq Gorakhpuri Shayari Collection
"Na Jane Ashk Se Aankhon Mein Kyun Hai Aaye Hue"
-Firaq Gorakhpuri
Na Jane Ashk Se Aankhon Mein Kyun Hai Aaye Hue
Guzar Gaya Zamaana Tujhe Bhulaye Hue
Jo Manzilein Hain To Bas Raahravaan-E-Ishq Ki Hain
Wo Saans Ukhdi Hui Paanv Dagmagaaye Hue
Na Rahzanon Se Ruke Raaste Mohabbat Ke
Wo Qaafile Nazar Aaye Lute Lutaaye Hue
Ab Is Ke Baad Mujhe Kuch Khabar Nahin Unki
Gham-Aashnaa Hue Apne Hue Paraaye Hue
Ye Iztiraab Saa Kyaa Hai Ki Muddatein Guzari
Tujhe Bhulaye Hue Teri Yaad Aaye Hue
"Ras Mein Dooba Hua Lahrata Badan Kya Kahna"
-Firaq Gorakhpuri
Ras Mein Dooba Hua Lahrata Badan Kya Kahna
Karwatein Leti Hui Subh-E-Chaman Kya Kahna
Bagh-E-Jannat Mein Ghata Jaise Baras Ke Khul Jaye
Sondhi-Sondhi Teri Khushboo-E-Badan Kya Kahna
Jaise Leharaye Koi Shola, Kamar Ki Ye Lachak
Sar-Ba-Sar, Aatish-E-Sayyaal Badan Kya Kahna
Qaamat-E-Naaz, Lachkatee Hui Ek Qaus-E-Qaza
Zulf-E-Shab, Rang Ka Chaya Hua Gahan Kya Kahna
Jis Tarah Jalwa-E-Firdaus Hawaaon Se Chine
Pairahan Mein Tere Rangeeni-E-Tan, Kya Kahna
Jalwa-O-Parda Ka Yeh Rang Dam-E-Nazara
Jis Tarah Adh-Khuli Ghunghat Men Dulhan Kya Kahna
Jagmagahat E Jabeen Ki Hai, Ke Pau Phatati Hai
Muskurahat Hai Teri Subah-E-Chaman Kya Kahna
"Sar Men Sauda Bhi Nahi Dil Men Tamanna Bhi Nahi"
-Firaq Gorakhpuri
Sar Men Sauda Bhi Nahi Dil Men Tamanna Bhi Nahi
Lekin Is Tark-E-Mohabbat Ka Bharosa Bhi Nahi
Yoon To Hangaame Uthaate Nahin Diwana-E-Ishq
Magar Aye Dost Kuch Aison Ka Thikana Bhi Nahi
Muddatein Guzaari Teri Yaad Bhi Aayi Na Hamein
Aur Hum Bhool Gaya Hun Tujhe Aisa Bhi Nahi
Ye Bhi Sach Hai Ke Mohabbat Mein Nahi Main Majboor
Ye Bhi Sach Hai Ke Tera Husn Kuch Aisa Bhi Nahi
Dil Ki Ginti Na Yaganon Mein Na Beganon Mein
Lekin Is Jalwaa-gaah-E-Naaz Se Uthataa Bhi Nahi
Badgumaan Ho Ke Mil Aaye Dost Jo Milna Hai Tujhe
Ye Jhijhakte Hue Milna Koi Milna Bhi Nahi
Shikva-E-Jaur Kare Kyaa Koi Us Shokh Se Jo
Saaf Qaayal Bhi Nahi Saaf Mukartaa Bhi Nahi
Mehrbaani Ko Mohabbat Nahi Kehte Aye Dost
Aah Mujhse To Meri Ranjish-E-Bejaan Bhi Nahi
Baat Ye Hai Ki Sukoon-E-Dil-E-Wehshi Ka Maqaam
Kunj-E-Zindaan Bhi Nahin Vusa'at-E-Sehraa Bhi Nahi
Moonh Se Ham Apne Buraa To Nahi Kehte, Ke 'Firaq'
Hai Tera Dost Magar Aadmi Achchha Bhi Nahi.
"Chhalak Ke Kam Na Ho Aisi Koi Sharaab Nahin"
-Firaq Gorakhpuri
Chhalak Ke Kam Na Ho Aisi Koi Sharaab Nahi
Nigaah-E-Nargis-E-R'anaa Teraa Jawaab Nahi
Zameen Jaag Rahi Hai Ki Inqalaab Hai Kal
Wo Raat Hai Koi Zara Bhi Mahv-E-Khwaab Nahi
Zameen Us Ki Falak Us Ka Qaynaat Us Ki
Kuch Aisa Ishq Tera Khaanma-Kharaab Nahi
Jo Tere Dard Se Mehroom Hai Yahan Un Ko
Gham-E-Jahaan Bhi Suna Hai Ki Dast-Yaab Nahi
Abhi Kuch Aur Ho Insaan Ka Lahoo Paani
Abhi Hayaat Ke Chehre Pe Aab-O-Taab Nahi
Dikha To Deti Hai Behtar Hayat Ke Sapne
Kharaab Ho Ke Bhi Ye Zindagi Kharab Nahi
"Tharthari Si Hai Aasmaanon Mein"-Firaq Gorakhpuri
Tharthari Si Hai Aasmaanon Mein
Zor Kuchh To Hai Naatavaanon Mein
Kitna Khamosh Hai Jahan Lekin
Ek Sada Aa Rahi Hai Kaanon Mein
Koi Soche To Farq Kitna Hai
Husn Aur Ishq Ke Fasanon Mein
Maut Ke Bhi Ude Hain Aksar Hosh
Zindagi Ke Sharab-Khanon Mein
Jin Ki Taamir Ishq Kartaa Hai
Kaun Rehtaa Hai Un Makaanon Mein
Inhi Tinkon Men Dekh Ai Bulbul
Bijliyaan Bhi Hain Aashiyaanon Mein
"Main Hosh-E-Anadil Hun Mushkil Hai Sambhal Jaana"-Firaq Gorakhpuri
Main Hosh-E-Anadil Hun Mushkil Hai Sambhal Jaana
Ae Baad-E-Saba Meri Karwat To Badal Jaana
Taqdeer-E-Muhbbat Hoon Mushkil Hai Badal Jaana
Sau Baar Sambhal Kar Bhi Maaloom Sambhal Jaana
Uss Aankh Ki Masti Hoon Ai Bada-Kasho Jiska
Uth Kar Sare-Maikhana Mumkin Hai Badal Jaana
Ayaam-E-Baharaan Mein Diwaanon Ke Tevar Bhi
Jis Simt Nazar Utthe Aalam Ka Badal Jaana
Ghanghor Ghataon Mein Sarshaar Fazaaon Mein
Makhmoor Hawaon Mein Mushkil Hai Sambhal Jaana
Hun Lagzish-E-Mastaana Maikhaana-E-Aalam Mein
Barq-Nigaah-E-Saaqi Kuch Bach Ke Nikal Jaana
Iss Gulshan-E-Hasti Mein Kam Khilte Hain Gul Aise
Duniya Mehak Utthe Gi Tum Dil Ko Masal Jana
Main Saaz-E-Haqeeqat Hoon Soya Hua Naghma Tha
Tha Raaz-E-Nihaan Koi Pardon Se Nikal Jaana
Hoon Nakhat-E-Mastaana Gulzaar-E-Muhbbat Mein
Madhoshi-E-Aalam Hai Pehlu Ka Badal Jaana
Masti Mein Lagaavat Se Uss Aankh Ka Ye Kehna
Mai-Khwaar Ki Niyat Hoon Mumkin Hai Badal Jaana
Jo Tarz-E-Ghazal-Goi ‘Momin’ Ne Tarah Ki Thi
Sad-Haif 'Firaq' Uss Ka Sad-Haif Badal Ajana
"Ye Mana Zindagi Hai Chaar Din Ki"-Firaq Gorakhpuri
Ye Mana Zindagi Hai Chaar Din Ki
Bahut Hote Hain Yaaro Chaar Din Bhi
Khuda Ko Paa Gaya Waa-iz Magar Hai
Zaroorat Aadmi Ko Aadmi Ki
Milaa Hoon Muskuraa Ke Us Se Har Baar
Magar Aankhon Men Bhi Thi Kuchh Nami Si Thi
Muhabbat Men Kahen Kyaa Haal Dil Kaa
Khushi Hi Kaam Aati Hai Na Gham Hi
Bhari Mehfil Mein Har Ek Se Bachakar
Teri Aankhon Ne Mujh Se Baat Kar Li
Ladakpan Ki Adaa Hai Jaan-Levaa
Ghazab Ki Chhokri Hai Haath-Bhar Ki
Raqib-E-Gham-Zadaa Ab Sabr Kar Le
Kabhi Us Se Meri Bhi Dosti Thi
"Bahut Pahle Se Un Qadmon Ki Aahat Jaan Lete Hain"-Firaq Gorakhpuri
Bahut Pahle Se Un Qadmon Ki Aahat Jaan Lete Hain
Tujhe Ai Zindagi Ham Door Se Pehchan Lete Hain
Meri Nazrein Bhi Aise Qaatilon Kaa Jaan-O-Imaan Hai
Nigaahen Milte Hi Jo Jaan Aur Imaan Lete Hain
Tabiyat Apni Ghabraati Hai Jab Sun-Saan Raaton Mein
Ham Aise Men Teri Yaadon Ki Chaadar Taan Lete Hain
Khud Apna Faisla Bhi Ishq Men Kafi Nahin Hota
Use Bhi Kaise Kar Guzrein Jo Dil Men Thaan Lete Hain
Jise Soorat Batate Hain Pata Deti Hai Sirat Ka
Ibarat Dekh Kar Jis Tarha Mani Jaan Lete Hain
Tujhe Ghaata Na Hone Denge Karobaar-E-Ulfat Mein
Ham Apne Sar Tera Aye Dost Har Ehsaan Lete Hain
Hamaari Har Nazar Tujhse Nayi Saugandh Khaati Hai
To Teri Har Nazar Se Ham Nayaa Paigaam Lete Hain
'Firaq' Aksar Badal Kar Bhes Milataa Hai Koi Qaafir
Kabhi Ham Jaan Lete Hain Kabhi Pahachaan Lete Hain
"Chiragh-E-Toor Jalaao Bahut Andhera Hai"-Firaq Gorakhpuri
Sakoot-E-Shaam Mitaao Bahut Andheraa Hai
Sukhan Ki Shamaa Jalaao Bahut Andheraa Hai
Dayaar-E-Gham Men Dil-E-Beqaraar Chhoot Gayaa
Sambhal Ke Dhoodhne Jaao Bahut Andheraa Hai
Ye Raat Vo Ke Soojhe Jahaan Na Haath Ko Haath
Khayaalon Door Na Jaao Bahut Andheraa Hai
Laton Ko Chehre Pe Daale Vo So Rahaa Hai Kahin
Zayaa-E-Rukh Ko Churaao Bahut Andheraa Hai
Havaayen Nim Shabi Hon Ki Chaadar-E-Anjum
Naq Aab Rukh Se Uthaao Bahut Andheraa Hai
Shab-E-Siyaah Men Gum Ho Gai Hai Raah-E-Hayaat
Qadam Sambhal Ke Uthaao Bahut Andheraa Hai
Guzashtaa Ahd Ki Yaadon Ko Phir Karo Taazaa
Bujhe Chiraagh Jalaao Nahut Andheraa Hai
Thi Ek Uchatati Hui Neend Zindagi Uski
'Firaq' Ko Na Jagaao Bahut Andheraa Hai
Chiraagh-E-Toor Jalaao Bahut Andheraa Hai
Zaraa Naqaab Uthaao Bahut Andheraa Hai
Abhi To Sub’h Ke Maathe Kaa Rang Kaalaa Hai
Abhi Fareb Na Khaao, Bahut Andheraa Hai
Mujhe Khud Apnii Nigahon Pe Aitmaad Nahiin
Mere Kareeb Na Aao Bahut Andheraa Hai
"Maut Ek Geet Raat Gaati Thi"-Firaq Gorakhpuri
Maut Ek Geet Raat Gaati Thi
Zindagi Jhoom-Jhoom Jaati Thi
Kabhi Divaane Ro Bhi Pa.Date The
Kabhi Teri Bhi Yaad Aati Thi
Kis Ke Maatam Men Chaand Taaron Se
Raat Bazm-E-Azaa Sajaati Thi
Rote Jaate The Tere Hijr Nasib
Raat Furqat Ki Dhalati Jaati Thi
Khoi Khoi Si Rahti Thi Vo Aankh
Dil Kaa Har Bhed Paa Bhi Jaati Thi
Zikr Thaa Rang-O-Boo Kaa Au' Dil Men
Teri Tasvir Utarti Jaati Thi
Husn Men Thi In Aansooon Ki Chamak
Zindagi Jin Men Muskuraati Thi
Dard-E-Hasti Chamak Uthaa Jis Men
Vo Ham Ahl-E-Vafaa Ki Chhaati Thi
Tere Un Aansooon Ki Yaad Aai
Zindagi Jin Men Muskuraati Thi
Thaa Sukoot-E-Fazaa Tarannum-Rez
Boo-E-Gesoo-E-Yaar Gaati Thi
Gham-E-Jaanaan Ho Yaan Gham-E-Dauraan
Lau Si Kuchh Dil Men Jhil-Milaati Thi
Zindagi Ko Vafaa Ki Raahon Men
Maut Khud Raushni Dikhaati Thi
Baat Kyaa Thi Ki Dekhte Hi Tujhe
Ulfat-E-Zist Bhool Jaati Thi
The Na Afalaak Gosh Bar Aavaaz
Be-Khudi Daastaan Sunaati Thi
Karvaten Le Ufaq Pe Jaise Subah
Koi Doshizaa Kas-Masaati Thi
Zindagi Zindagi Ko Vaqt-E-Safar
Kaaravaan-Kaaravaan Chhupaati Thi
Saamne Tere Jaise Koi Baat
Yaad Aa-Aa Ke Bhool Jaati Thi
Vo Teraa Gham Ho Yaa Gham-E-Duniyaa
Shamma-Si Dil Men Jhil-Milaati Thi
Gham Ki Vo Daastaan-E-Nim-Shabi
Aasmaanon Koo Nind Aati Thi
Maut Bhi Gosh Bhar Sadaa Thi "Firaq"
Zindagi Koi Git Gaati Thi
"Koi Nayi Zamin Ho Naya Aasmaan Bhi Ho"-Firaq Gorakhpuri
Koi Nayi Zamin Ho Nayaa Aasamaan Bhi Ho
Ai Dil Ab Us Ke Paas Chalen Vo Jahaan Bhi Ho
Afsurdagi-E-Ishq Men Soz-E-Nihaan Bhi Ho
Yaani Bujhe Dilon Se Kuchh Uthataa Dhuaan Bhi Ho
Is Darjaa Ikhtilaat Aur Itani Mugaayarat
Too Mere Aur Apne Kabhi Daramiyaan Bhi Ho
Ham Apne Ghamgusaar-E-Muhabbat Na Ho Sake
Tum To Hamaare Haal Pe Kuchh Meharbaan Bhi Ho
Bazm-E-Tasavurrat Men Ai Dost Yaad Aa
Is Mahafil-E-Nishaat Men Gham Kaa Samaan Bhi Ho
Mahaboob Vo Ki Sar Se Qadam Tak Khuloos Ho
Aashiq Vahi Ki Husn Se Kuchh Badgumaan Bhi Ho
Raat Bhi Neend Bhi Kahani Bhi-Firaq Gorakhpuri
Raat Bhi Neend Bhi Kahani Bhi
Haaye Kya Cheez Hai Javaani Bhi
Ek Paigham-E-Zindagani Bhi
Aashiqi Marg-E-Nagahaani Bhi
Is Adaa Kaa Teri Jawaab Nahi
Meharbani Bhi Sargaraani Bhi
Dil Ko Apne Bhi Gham The Duniya Mein
Kuch Balaayein Thi Aasmaani Bhi
Mansab-E-Dil Khushi Lutataa Hai
Gham-E-Pinhaan Bhi Paasbaani Bhi
Dil Ko Sholon Se Karati Hai Sairaab
Zindagi Aag Bhi Hai Paani Bhi
Shaad-Kaamon Ko Ye Nahin Taufeeq
Dil-E-Ghamgeen Ki Shaad-Maani Bhi
Laakh Husn-E-Yaqin Se Ba.Dakar Hai
In Nigaahon Ki Badghumaani Bhi
Tanganaa-E-Dil-E-Malaal Mein Hai
Behr-E-Hasti Ki Bekaraani Bhi
Ishq-E-Nakaam Ki Hai Parchaai
Shaad-Maani Bhi Kaamraani Bhi
Dekh Dil Ke Nigaar-Khaane Mein
Zakhm-E-Pinhaan Ki Hai Nishaani Bhi
Khalq Kyaa-Kyaa Mujhe Nahin Kehti
Kuch Sunoon Main Teri Zabaani Bhi
Aaye Taarikh-E-Ishq Mein Sau Baar
Maut Ke Daur-Darmiyaani Bhi
Apni Masoomiyon Ke Parde Mein
Ho Gayi Wo Nazar Sayaani Bhi
Din Ko Sooraj-Mukhi Hai Wo Nawgul
Raat Ko Wo Hai Raat-Raani Bhi
Dil-E-Badanaam Tere Baare Mein
Log Kehte Hain Ek Kahaani Bhi
Nazm Karate Koi Nayi Duniya
Ki Ye Duniya Hui Puraani Bhi
Dil Ko Aadaab-E-Bandagi Bhi Na Aaye
Kar Gaye Log Hukmaraani Bhi
Jaur-E-Kam-Kam Ka Shukriya Bas Hai
Aap Ki Itni Meharbaani Bhi
Dil Men Ek Hook Bhi Uthe Aye Dost
Yaad Aai Teri Jawaani Bhi
Sar Se Paon Tak Sapurdagi Ki Adaa
Ek Andaaz-E-Turkmaani Bhi
Paas Rehna Kisi Kaa Raat Ki Raat
Mehmaani Bhi Mezbaani Bhi
Jo Na Aks-E-Jabin-E-Naaz Ki Hai
Dil Men Ek Noor-E-Kehkashaani Bhi
Zindagi Ain Did-E-Yaar "Firaq"
Zindagi Hijr Ki Kahaani Bhi
Subscribe to:
Post Comments
(
Atom
)
No comments :
Post a Comment