Manzar-Bhopali-Ghazal-Lyrics
Manzar Bhopali - Ghazal Lyrics
Unche Unche Naamon Ki Takhtiyan Jalaa Dena
Unche Unche Naamon Ki Takhtiyan Jalaa Dena
Zulm Karne Waalon Ki Wardiyan Jalaa Dena
Dar-Badar Bhatakna Kya Daftaron Ke Jungle Mein
Belche Uthaa Lena Degreeyan Jala Dena
Maut Se Jo Dar Jaaye Zindagi Nahin Milti
Jang Jitni Chaaho Kishtiyaan Jala Dena
Phir Bahu Jalaane Ka Haq Tumhein Pahunchta Hai
Pehle Apne Aangan Mein Betiyaan Jala Dena
Sadaa Deti Hai Khushbu Chaand Taare Bol Padte Hain
Sadaa Deti Hai Khushbu Chaand Taare Bol Padte Hain
Nazar Jaisi Nazar Ho To Nazaare Bol Padte Hain
Tumhari Hi Nigahon Ne Kaha Hai Hum Se Ye Aksar
Tumhare Jism Par To Rang Saare Bol Padte Hain
Mahek Jaate Hain Gul Jaise Saba Ke Choom Lene Se
Agar Lehrein Mukhaatib Hon Kinaare Bol Padte Hain
Zabaan Se Baat Karne Mein Jahaan Rusvaai Hoti Hai
Wahaan Khaamosh Aankhon Ke Ishaare Bol Padte Hain
Chhupana Chaahte Hain Unse Dil Ka Haal Hum Lekin
Hamaare Aansuon Men Gham Hamaare Bol Padte Hain
Teri Pabandiyon Se Ruk Nahin Sakti Ye Fariyaadein
Agar Hum Chup Rahein To Zakhm Saare Bol Padte Hain
Pattharon Ki Baarish Se Kaise Sar Bachaao Ge
Pattharon Ki Baarish Se Kaise Sar Bachaao Ge
Tum Agar Sitamgar Ko Aainaa Dikhaao Ge
Hum Ko Likhne Waale Ne La-Zawaal Likhaa Hai
Hum To Aur Ubhren Ge Jis Qadar Mitaao Ge
Dushmani Ki Mitti Men Pyaar Ug Nahin Sakta
Tum Ne Khaar Boye Hain Phool Kaise Paao Ge
Roz-O-Shab Sataane Ki Tum Ne Thaan Rakkhi Hai
Jitna Tum Bhulaao Ge Aur Yaad Aayen Ge
Sood-Khor Dunia Ka Qarz Kaise Utre Ga
Apne Baad Bete Per Bojh Chhod Jaao Ge
Pathra Gaya Hai Jaise Ke Ehsaas-E-Ranj-O-Gham
Pathra Gaya Hai Jaise Ke Ehsaas-E-Ranj-O-Gham
Ek Doosre Ki Maut Pa Hansne Lage Hain Hum
Phir Likhne Waale Kyun Na Qaseede Likhein Tere
Chaandi Ki Raushnaai Hai, Sone Ke Hain Qalam
Nikle They Kitne Shauq Se Gulshan Ki Sair Ko
Phoolon Ke Ghaao Dekhe, Sune Khushbuon Ke Gham
Iss Ahd Ka To Sab Se Bada Saaneha Hai Yeh
Jo Uthne Waale Sar They Wohi Ho Rahe Hain Kham
Badli Na Do Dilon Ki Kahaani Wohi Rahi
Aanchal Tumhaara, Aur Meri Aasteen Hai Nam
‘Manzar’ Mizaaj-E-Yaar Ki Paabandiyon Ko Chhod
Har Ek Baat Par Sar-E-Tasleem Kar Na Kham
Judaai Ho Ke Milan Har Ada Hamaari Hai
Judaai Ho Ke Milan Har Ada Hamaari Hai
Tumhaara Shahar Hai Lekin Fiza Hamaari Hai
Shikaayaten Bhi Karen Ham To Kis Zabaan Se Karen
Khuda Banaaya Ham Ne Ye Khata Hamaari Hai
Hamaare Jism Ki Uriyaaniyat Pe Mat Hansnaa
Ke Tum Jo Odhe Hue Ho Vo Rida Hamaari Hai
Hamaare Saamne Zeba Nahin Ghuroor Tumhen
Jahaan Pe Baithe Ho Tum Vo Jagah Hamaari Hai
Harf Harf Rat Kar Bhi Aagahi Nahin Milti
Harf Harf Rat Kar Bhi Aagahi Nahin Milti
Aag Naam Rakhne Se Raushni Nahin Milti
Sochne Samajhne Ko Faasilaa Hi Behtar Hai
Raat Din Ki Qurbat Se Dosti Nahin Milti
Mithi Mithi Baaton Men Sirf Sach Nahin Hota
Maslehat-Pasandon Men Sar-Kashi Nahin Milti
Aadmi Se Insaan Tak Aa Gaye To Samjho Ge
Kyon Chiraagh Ke Neeche Roshni Nahin Milti
Be-Libaas Hone Se Bach Gaya To Kya “Manzar”
Aaj Gaanv Men Kal Ki Saadgi Nahin Milti
Hamaare Dil Pe Jo Zakhmon Ka Baab Likhaa Hai
Hamaare Dil Pe Jo Zakhmon Ka Baab Likhaa Hai
Usi Men Vaqt Ka Saaraa Hisaab Likhaa Hai
Kuch Aur Kaam To Ham Se Na Ho Saka Lekin
Tumhaare Hijr Ka Ek Ek Azaab Likhaa Hai
Sulook Nishtaron Jaisa Na Keejiye Ham Se
Hamesha Aap Ko Ham Ne Gulaab Likhaa Hai
Tere Vajood Ko Mahsoos Umr Bhar Hogaa
Tere Labon Pe Jo Ham Ne Javaab Likhaa Hai
Hua Fasaad To Us Men Nahin Kisi Ka Qusoor
Havaa-E-Shah’r Ne Mausam Kharaab Likhaa Hai
Agar Yaqeen Nahin To Uthaaiye Taarikh
Hamaara Naam Basad Aab-O-Taab Likhaa Hai
Ek Nayaa Mod Dete Hue Phir Fasaana Badal Dijiye
Ek Nayaa Mod Dete Hue Phir Fasaana Badal Dijiye
Ya To Khud Hi Badal Jaaiye Ya Zamaana Badal Dijiye
Tar Nivaale Khushaamad Ke Jo Khaa Rahe Hain Vo Mat Khaaiye
Aap Shaheen Ban Jaayen Ge Aab-O-Daana Badal Dijiye
Ahl-E-Himmat Ne Har Daur Men Koh Kaate Hain Taqdeer Ke
Har Taraf Raaste Band Hain, Ye Bahaana Badal Dijiye
Tai Kiya Hai Jo Taqdeer Ne Har Jagah Saamne Aayega
Kitni Hi Hijraten Keejiye Ya Thikaana Badal Dijiye
Ham Ko Paala Tha Jis Ped Ne Us Ke Patte Hi Dushman Hue
Kah Rahi Hain Daaliyaan, Aashiyaana Badal Dijiye
Dil Hai Heere Ki Kani Jism Gulaabon Vaalaa
Dil Hai Heere Ki Kani Jism Gulaabon Vaalaa
Mera Mahaboob Hai Dar-Asl Kitaabon Vaalaa
Husn Hai Rang Hai Shokhi Hai Ada Hai Us Men
Ek Hi Jaam Magar Kitni Sharaabon Vaalaa
Mujh Se Hogi Nahin Duniyaa Ye Tijaarat Dil Ki
Main Karoon Kya Ke Mera Zahan Hai Khvaabon Vaalaa
Too Rahega Na Tere Zulm Rahenge Baaqi
Din To Aana Hai Kisi Roz Hisaabon Vaalaa
Yaar Aainaa Hua Karte Hain Yaaron Ke Liye
Tera Chehra To Abhi Tak Hai Naqaabon Vaalaa
Mujh Se Hogi Nahin Duniya Ye Tijaarat Dil Ki
Main Karoon Kya Ke Mera Zahan Hai Khvaabon Vaalaa
Jo Nazar Aataa Hai Haasil Nahin Hota 'Manzar'
Zindagaani Ka Safar Bhi Hai Saraabon Vaalaa
Badalate Vaqt Ka Ik Sil-Silaa Sa Lagata Hai
Badalate Vaqt Ka Ik Sil-Silaa Sa Lagata Hai
Ke Jab Bhi Dekho Use Doosara-Sa Lagata Hai
Tumhaara Husn Kisi Aadami Ka Husn Nahin
Kisi Buzurg Ki Sachchi Dua Sa Lagata Hai
Teri Nigaah Ko Tamiz Rang-O-Noor Kahan
Mujhe To Khoon Bhi Rang-E-Hina Sa Lagata Hai
Damaagh-O-Dil Hon Agar Mutma-In To Chhaaon Hai Dhoop
Thapeda Loo Ka Bhi Thandi Havaa Sa Lagata Hai
Vo Chhat Pe Aa Gaya Betaab Ho Ke Aakhir
Khuda Bhi Aaj Sharik-E-Dua Sa Lagata Hai
Tumhaara Haath Jo Aayaa Hai Haath Men Mere
Ab Aitabaar Ka Mausam Hara-Sa Lagata Hai
Nikal Ke Dekho Kabhi Nafaraton Ke Pinjare Se
Tamaam Shahar Ka "Manzar" Khula Sa Lagata Hai
Zulf O Rukkh Ke Saaye Main Zindagi Guzaari Hai
Zulf O Rukkh Ke Saaye Main Zindagi Guzaari Hai
Dhoop Bhi Hamari Hai Chhaon Bhi Hamaari Hai
Gham-Gusar Chehron Par Aitebar Mat Karna
Shehr Main Siaasat Ke Dost Bhi Shikaari Hain
Mod Lene Waali Hai Zindagi Koi Shayad
Abb Ke Phir Hawaaon Main Ek Be-Qaraari Hai
Ik Ajeeb Thandak Hai Uss Ke Narm Lehjey Main
Lafz Lafz Shabnam Hai Baat Baat Pyari Hai
Kutch To Paayen Ge Uski Qurbaton Ka Khamyaza
Dil To Ho Chuke Tukde Ab Saron Ki Baari Hai
Baap Bojh Dhota Tha Kya Jahez De Paata
Iss Liye Wo Shehzaadi Aaj Tak Kunwari Hai
Keh Do Meer O Ghalib Se Ham Bhi Sher Kehte Hain
Wo Sadi Tumhaari Thi Ye Sadi Hamaari Hai
Zubaan-E-Hind Hai Urdu
Zubaan-E-Hind Hai Urdu To Maathe Ki Shikan Kyun Hai
Watan Mein Be-Watan Kyun Hai
Meri Mazloom Urdu Teri Saanson Mein Ghutan Kyun Hai
Tera Lahjaa Mahekta Hai To Lafzon Mein Thakan Kyun Hai
Agar Tu Phool Hai To Phool Mein Itni Chubhan Kyun Hai
Watan Mein Be-Watan Kyun Hai
Ye Naanak Ki Ye Khusro Ki Daya Shankar Ki Boli Hai
Ye Diwali Ye Baisakhi Ye Eid-Ul-Fitr Holi Hai
Magar Ye Dil Ki Dhadkan Aaj Kal Dil Ki Jalan Kyun Hai
Watan Mein Be-Watan Kyun Hai
Ye Naazon Se Pali Thi Meer Ke Ghalib Ke Aangan Mein
Jo Suraj Ban Ke Chamki Thi Kabhi Mehlon Ke Daaman Mein
Wo Shah-Zaadi Zabanon Ki Yahan Be-Anjuman Kyun Hai
Watan Mein Be-Watan Kyun Hai
Muhabbat Ka Sabhi Eilaan Kar Jaate Hain Mehfil Mein
Ke Is Ke Waaste Jazbaa Hai Hamdardi Ka Har Dil Mein
Magar Haq Maangne Ke Waqt Ye Begaana-Pan Kyun Hai
Watan Mein Be-Watan Kyun Hai
Ye Doshiza Jo Bazaaron Se Ithlaati Guzarti Thi
Labon Ki Nazuki Jis Ki Gulabon Si Bikharti Thi
Jo Tahzibon Ki Sar Ki Odhni Thi Ab Kafan Kyun Hai
Watan Mein Be-Watan Kyun Hai
Muhabbat Ka Agar DaWaa Hai To Is Ko Bachaao Tum
Jo Wadaa Kal Kiya Tha Aaj Wo Wadaa Nibhaao Tum
Agar Tum Ram Ho To Phir Ye Rawan Ka Chalan Kyun Hai
Watan Mein Be-Watan Kyun Hai
Subscribe to:
Post Comments
(
Atom
)
No comments :
Post a Comment